Таҗетдинов Әнәс Габдулла улы 1927 елның 23 февралендә ТАССРның Зәй районы Югары Налим авылында туа. 1934-1944 елларда Югары Багряж урта мәктәбендә укый, 1942 елда комсомолга керә. Мәктәпне тәмамлагач “Кызыл октябрь” колхозында эшли. 1944 елның декабрендә СССР Кызыл армиясенә чакырыла һәм 6 нчы аерым өйрәнү батальонына курсант итеп алына. 1945 елның августында 61469 нчы хәрби частька күчерелә, хезмәте тәмамланганчы – 1951 елның апреленә кадәр шунда хезмәт итә.
Демобилизациядән соң Казанга кайта. 1951 елның мартыннан КПСС әгъзасы. 1951 елның маенда 40 нчы трестта тимер юл тармагы бригадиры вазыйфасында эшли башлый. 1951 елның сентябрендә Казан юридик институтына керә. Институтны бетерү белән бәйле рәвештә 1952 елның июнендә В.И.Ульянов-Ленин исемендәге Казан дәүләт университетының юридик факультетына күчерелә, аны 1956 елда тәмамлый. Укуын тәмамлаганнан соң ТАССР Саба районы Икшермә мотор-трактор станциясенең партия оешмасы секретаре вазыйфасына алына. 1957-1959 елларда ТАССР КПСС Саба райкомының пропаганда һәм агитация бүлеге мөдире һәм секретаре булып эшли. 1959-1962 елларда КПСС Татар обкомы пропаганда һәм агитация бүлеге инструкторы була. 1962 елда Татар АССР Балтач районына КПСС беренче секретаре итеп җибәрелә. 1965 елдан 1971 елга кадәр КПСС Татар обкомы пропаганда һәм агитация бүлегенең мәдәният мөдире урынбасары (аннары мөдире) булып эшли.
1971 елның 4 февраленнән А.Г. Таҗетдинов ТАССР юстиция министры вазыйфасына билгеләнә. Министрлыкта эшләгән чорында “1941-1945 еллардагы Бөек Ватан сугышында җиңүгә 30 ел” медале һәм “Партия һәм совет органнарында озак еллар нәтиҗәле эш өчен” мактау грамотасы белән бүләкләнә. Юстиция министры вазыйфасында Әнәс Габдулла улы 1987 елның 17 сентябренә кадәр эшли, 1987 елда аңа “ТАССРның атказанган юристы” почетлы исеме бирелә.